মাড়েয়াৰ কলম

মাড়েয়াৰ কলম  

August 2014

আৰ হাৰেবাৰ মতো কিছুই নাই

কামতাপুৰী তথা কোচ ৰাজবংশী জনগনেৰ বাদে এই মাসটা খাস বিষাদপূর্ণ মাস । কেনেনা এই মাসতে কোচ ৰাজবংশী জনগন সর্বস্ব হাৰেয়া আজি সর্বহাৰা । অর্থাৎ ১৯৪৯ কড়ালেৰ ২৮ আগষ্টত মার্জাৰ এগ্রিমেন্টেৰ জৰিয়তে কোচ ৰাজবংশী জনগন খালি ৰাজ্যয় হাৰায় নাই হাৰাইছে মৌলিক অধিকাৰ , ৰাজনৈতিক অধিকাৰ আৰ সম্পত্তিৰ উপুৰাৎ থাকা অধিকাৰো । যাৰফলত দেখো আজি কোচ ৰাজবংশী বসতি এলেকা গিলাৰ কোনায়-কোনায়, খোকসা্য-খোকসায় কি অৱস্থাত এই খিলঞ্জীয়া জনগান আজি সামান্যতম প্রাপ্যৰ আশাত কেমুন ভাবত কক-বকেবা লাগা হইছে ; একবাৰ নজৰ কৰি দেখতো কোচ ৰাজবংশী জনগনেৰ ঘৰে-দুৱাৰে । আজিৰ তাৰিখত ঐতিহাসিক কামতাপুৰ ৰাজ্যৰ চিন-ছাপ বুলিতে শেষ-মেষ খালি মাত্র কোচবেহাৰেৰ ৰাজবাড়ীটা আৰ বাদ বাকী গিলা ইতিহাস তথা এই বৃহত্তৰ জাতিটাৰ প্রতি অবহেলিত মনোভাব পোষন কৰি আইসা ভাৰত সৰকাৰেৰ চকুমুঞ্জা নীতিৰ কাৰণে বিলুপ্ত হবাৰ পাইল । আৰ শেষ-মেষে ৰয়া যাওৱা কোচ ৰাজবংশী জনগনেৰ বাপ চৈধ্য পুৰুষেৰ যি ৰাজ ঐতিহ্য সেইটাও যে আজি কেমুন ৰূপত আছে তা আমাৰ জনগন ভালকৰি জ্ঞাত । মুঠ কথাত আজি কোচ ৰাজবংশী জনগনেৰ সামাজিক অবস্থা চৰম সংকটাপূর্ণ । কোচ ৰাজবংশী জনগন কামতাপুৰ ৰাজ্যৰ সাথে-সাথে ৰাজনৈতিক অধিকাৰ, মৌলিক অধিকাৰ, জমা-জমি আদি সউগ কিছু হাৰেয়া পৰৱতী সময়ত সামাজিক প্রানী ৰূপে জীৱন ধাৰণ কৰিবাৰ বাদে সাধাৰণ যিখিনি প্রাপ্য অধিকাৰেৰ প্রয়োজন সেখিনিও পাবাৰ বাদে শাসকীয় কর্তৃপক্ষৰ সু-নজৰেৰ থাকিয়া বঞ্চিত হয়া আইসা পৰিলক্ষিত হইছে । এমুন কি পাছত সউগ ক্ষেত্রতে শোষন-শাষনেৰ তথা নানান দিশ দিয়া যাতনা ভুগি আইসাৰ সাথতে জাত-পাতেৰ বৈষম্যগত আচৰনেৰো সন্মুখীন হ’বা লাগা হইল । তাৰ উপুৰা এই বৃহত্তৰ অঞ্চলেৰ জনগনক দুখান আঞ্চলিক প্রশাসনিক গোটত বিভক্ত কৰিয়া থান-বান কৰিয়া ঐতিহ্যমণ্ডিত জাতিটাক পৃথিৱীৰ বুকত থাকি নি:শেষ কৰি ফেলোয়াৰ এক ঘৃননীয় ষড়যন্ত্র এই থলুয়া জনগনেৰ উপৰাতে খাটোয়া পৰিলক্ষিত হইল । যাৰ বাবদত পশ্চিম বংগৰ বাঙালী সৰকাৰে বাঙালী গিলাৰ ভৱিষ্যত মেল্লা দিনেৰ বাদে সুৰক্ষিত ৰূপত ৰাখিবাৰ বাদে লাখ লাখ বিদেশী বাঙালীক একপ্রকাৰেৰ নিমন্ত্রন জানেয়া আনি কামতাপুৰেৰ মাটি দখল ধৰিবাৰ প্রেৰণা দেওয়া ইত্যাদিমূলক ঘৃণনীয় কাম কৰা পৰিলক্ষিত হইল । যাৰ ফলত আজি কামতাপুৰেৰ ভূমিপুত্র গিলানে মাটি-বাড়ী সউগ কিছু হাৰেয়া সর্বহাৰাত পৰিনত হয়া দিন হাজিৰা নাকৰিলে পেটত দানা-পানি না যাওৱাৰ মতো অবস্থা । হে মোৰ কোচ ৰাজবংশী জনগন কথাগিলা এমনে কওৱা নাহয় ; দেখো তোমাও একবাৰ আমাৰ বাস্তৱ সমাজেৰ পটভূমি । আজি আমাৰ অৱস্থা এমুন হইছে যে ‘আৰ আমাৰ হাৰাবাৰ মতো কিছুই নাই’ একমাত্র জীৱনটাৰ বাহিৰে . . . যদি জীৱনটাকো অথলে হাৰেবাৰ নাচান তাহলে ভাবতো আমাৰ এইবাৰ কৰণীয় কি ? জীৱনটা এমনে নষ্ট কৰাত কৰি তাহলে আইসোতো এইবাৰ জাতীয় স্বার্থ আৰ নৌতন প্রজন্মক ৰক্ষাৰ বাদে সংগ্রাম এখানেৰ যো-জা কৰি।

গালোময়ী কোচ

২৫/০৭/২০১৪ 

July 2014

কোচ ৰাজবংশী জাতিটা কি ‘Handicapped’

যাওয়া বছৰ এক বিশেষ কামত মনিপুৰ গেইছিলুং । অতে দেখা পাইছিলুং মেইতেই গিলানেৰ বৈচিত্রময় জীবন ধাৰণেৰ প্রণালি, চকুত লাগা ধৰণেৰ এক ৰমক-জমক সংস্কৃতি, উমাৰ আচাৰ-নীতি, ব্যবহাৰে মোৰ অন্তৰত এক অন্য ছাপ ফেলায় । খাওয়া-দাওয়া, পোসাক-পাতিৰ থাকি আৰম্ভ কৰি প্রতিটা দিশতে যে জাতিটায় অতীতেৰ থাকি এক আলাদা বৈশিষ্ট্য উভি নিয়া আইসছে তাক অনুমান কৰিলে বুজি পাওয়াত বাকী না-ৰয় ।  বিশেষ কৰি অতে মাজে মাজে ঘৰৱা ভাবে উদ্‌যাপিত কৰা কতোগিলা অনুষ্ঠানত অংশ গ্রহণ কৰি মোৰ অনুভবেৰ আইনাত ভাল মতোন কৰিয়ায় প্রতিফলিত কৰি যায় । তেমুনে এক ঘৰুৱা ভাবে পালিত ‘থবল চুম্বা নৃত্য’ অনুষ্ঠানত অংশ গ্রহণ কৰি মুই আপ্লুত হয়া যাং । ‘থবল চুম্বা’ মেইতেই গিলানেৰ পৰম্পৰাগত লোক নৃত্য । এই নৃত্যত বিয়া নাহওয়া (বেসিৰ ভাগ) চেঙৰা-চেঙৰীয়ে অংশগ্রহণ কৰে আৰ মন খুলি নৃত্য পৰিবেশন কৰে । মুঠ কথাত মুই দেখিলুং যে এই জাতিটায় চতুর্পাক দিয়া পৰম্পৰাগত সংস্কৃতি, এক আলাদা জতীয় বৈশিষ্ট্য আজিৰ এই গোলকীকৰণ যুগতো উমা ৰক্ষা কৰি আইসাত সক্ষম হইছে । এমুন কি উমাৰ বেসিৰ ভাগ মানুষেৰেই জাতীয় চেতনাও অন্য ৰকম, নিজকে মেইতেই বুলি কয়া উমা পৃথিবীৰ ভিতিৰাতে এক আলাদা বৈশিষ্ট্য সম্পন্ন জাতি বুলি সগৌৰবত দাবী কৰে । মোৰ জাতীয় চিন্তাৰ পাথাৰ খানত মেইতেই জাতিৰ প্রত্যক্ষ কৰা অনুভব খোনা প্রায় এক বছৰ কাল ধৰি ঘুৰ-পাক, ঘুৰ-পাক কৰি খেলে আছে । বর্তমানেৰ প্রেক্ষাপটত ইমাৰ সাথত (আৰ অন্য অন্য ঐতিহ্য সংস্কৃতি সম্পন্ন) আমাৰ কোচ ৰাজবংশী জাতিৰ কথা তুলনা কৰিলে কথা গিলা কেমুন বা নিজেৰ মাজত উশ্‌-পেশ্‌, উশ্‌-পেশ্‌ লাগে।  ইতিহাস সাক্ষী, ঐতিহ্যমণ্ডিত, জনসংখ্যাত প্রায় ডেৰ কোড়ল (আসাম-বেঙ্গল) বৃহৎ জনসমষ্টিৰ একটা জাতিক আজি কি ৰূপত দেখিবাৰ পাই সেটা বৰ ভাবিবাৰ বিষয়...! না... কোনো জাতীয় চেতনা, না... পৰম্পৰাগত সংস্কৃতি, কলা-কৃষ্টি গিলাক বাচে ৰাখিবাৰ বাদে দেখা যায় কোনো উন্মক্ত প্রেৰণা....! অবশ্যে ইয়াৰ আণ্ডালত শত্রু পক্ষেৰ অগ্রণী ভূমিকাৰ কথাটা মানি নিবায় লাগিব । কথা হইল ; শত্রু পক্ষ তো থাকিবই, প্রশ্নটা হইল কোচ ৰাজবংশী গিলা জাতীয় অস্থিত্ত্ব ৰক্ষাৰ বাদে শত্রু পক্ষেৰ সাথত যুদ্ধত অবতীর্ণ হওয়াৰ বাদে কতো সমান প্রস্তুত ? চিন্তা কৰা লাগিব ভাৰতে স্বাধীনতা লাভ কৰাৰ আজি কতোদিন হইল(১৯৪৭, ১৫ আগষ্ট) সাথতে কোচ ৰাজবংশী তথা কামতাপুৰী জনগনে স্বাধীনতা হাৰেবাৰ আজি কতোদিন হইল (১৯৪৯, ২৮ আগষ্ট মার্জাৰ এগ্রিমেন্ট) । এই কথাগিলা আজি চিন্তা কৰাৰ দৰকাৰ । চিন্তাৰ বিষয়..! বিশেষ কৰি কোচ ৰাজবংশী জনগনেৰ ! ৰাজপাট  আছিল কাৰ...? ৰাজনৈতিক অধিকাৰ হাৰাইছে কায়...? সেইবাদেইতো কথাগিলাৰ আদি-মূল বিশ্লেষণ কৰি প্রশ্নৰ সুৰত কবাৰ চাং “কোচ ৰাজবংশী জাতিটা কি Handicapped” ? প্রশ্নটা আপাতত ‘উদাং ঘৰে’ৰ পাঠক সমাজেৰ বিবেচনাৰ উপুৰাত....।

      সগাৰে শেষত নৌতন কৰি আৰম্ভৰ কৰিবাৰ নেওয়া “ইন্টাৰনেট সংস্কৰণ কোচ ৰাজবংশী জাতিৰ মাসিক আলোচনী উদাং ঘৰ” নৌতন দৃষ্টি ভংঙ্গী দিয়া বৰেয়া নিবেন বুলি আমা আশাবাদী সাথতে আমাৰো এই প্রচেষ্টা অব্যাহত ৰব বুলি পাঠক সমাজেৰ ওছৰত আমাৰ আলোচনী গোষ্ঠী জবান-বন্ধী...।।

-      গালোময়ী কোচ

    ২৮/০৬/২০১৪